Zu Hause angekommen

13.11.2011

Willkommens-Schnitzelbangg von Papi Walti Koster

Ich bi kai Maa vo lange Rede
doch hütte muess es si
ich ha versucht e baar Värsli z’dichte
und ha euch folgendes zum brichte

d’Silvia und dr Simon sinn wieder doo
do drüber sinn mir alli froh
nach über 2 Johr dur d’Wält duure goh
sinn si gsund wieder ummekoh

Uff dr Tartaruga – e Katamaran e grosse
löhn si sich übere Atlantik bloose
nur Wasser und Himmel wyt und breit
und öppe e Delphin – wo sali sait

Si seegle über 3 Wuche und gsehn kai Land
doch denn entdecke si Karibikstrand
dört göhn si go dauche und go erkunde
si hänn viel gseh und uusegfunde

Nach eme Abstächer nach Florida
foot in Equador e neus Abentür a
mit dr Sunrise – enere schigge Yacht
hänn si sich uff s’Wasser g’macht

Erschti Etappe isch Galapagos
e Naturparadies so mega gross
dort läbe Dier und Pflanze in ere Wält
fascht unveränderet – vo Mensche Händ

Die nöggscht Rieseetappe – also die zweiti
füehrt si denn in südlichi Breiti
3 Wuche seegle bis zum nöchste Land
Marquesas heisst dä schööni Strand.

Denn seegle si in der Südsee umme
glabbere Insle ab – und hänn viel Sunne
Tahiti, Bora Bora, Fiji und so Näme
mit dräume nur – dass mer dört ane käme

Für unseri zwei Meeresbiologe
gits viel z’dauche unter d’Wooge
do git’s Schildgrotte – und viel schööni Fisch
e mänge landet uff em Disch

Australie isch ihr nöggscht Zwüscheziel
s’seegle wird ene langsam z’viel
si stiige vo dr’Yacht – um in e Camper
und wärde nach 10 Moonet – eifach zue Trämper

Do erkunde si dr Norde – und denn ab dur d’Mitti
abe in Süüde – in dääre droggene Wyti
doch kuum sinn si duure – gits im Noorde Rääge
e sooviel – dass es nümme isch e Sääge

Neuseeland ligt nääbe dra – im Oschte
also hopp e Abstächer – in e Fluugi ine moschte
uff Räder hänn si s’Land erkunde dörfe
zwüsche ine sinn si au go surfe

Vorhär e Aerdbebe – Christchurch hets geschüttlet
dehaim hämmer zitteret – doch an de Plän wird nit grüttlet
und au nochhär no eins – e soone Glück
denn sinn si scho wäg – e grosses Stück

Denn kunnt vo Australie no der Weschte
bi Kenner g’hört Perth halt eifach zum Beschte
in d’Schuel gange isch d’Silvia do früener scho
het änglisch büfflet um wieder z’koh

Mit eme schnälle Flug quer uff Mackai zrugg z’Nacht
sinn si nach 8 Moonet wieder uff dr Sunrise – ihrer Yacht
jetzt sin si Skipper und Boss uff däm Schiff
hänn sälber Verantwortig – z’ramme kai Riff.

Si seegle wyter via Cairns gege Nordweschte
Indonesie bim dauche go teschte
in Bali – d’Insle vo ihrer Hochzytsreis
spanne si uus – und hänn immer no kai Mais.

Si bsueche e Uffzucht station uf Borneo
wäge däne Orang Utans sinn di do ane ko
die kömme noch und frässe Banane
ein goot der Silvia bis an d’Hoose aane

Denn seegle si wyter Richtig Singapur
si hänn Zyt und bruuche kai Uhr
dert hoole si dr Sievi vom Flugi ab
uff dr Sunrise wird der Platz nit knapp

Dä neu Matroos legt tüchtig Hand aa
und het sogar au no dr Plausch dra
au uff e Mascht uffe glätteret isch er – uff dränge
het d’Ussicht gnosse, s’het em nit welle länge

Bis Langkawi uffe – dr Küschte entlang
sinn si gseeglet – stundelang
und hett der Wind wiederemol nid welle
hänn si miesse der Motor aastelle

Bis Phuket isch denn die letschti Etappe
do sinn si scho wieder ohni Babbe
mit Rebi und Dani goht’s au zum dauche
e böses Wätter duet si heftig schlauche

In Phuket isch denn doch gli Schluss
sie düen bestiige – e Berliner Airbus
und düse wieder Richtig Schwyz
drum fiire mer zämme hütt e bitz.

Hinterlasse eine Antwort